2Ch 36 | NdeIBE | STEP | Abantu belizwe bathatha uJehoyahazi indodana kaJosiya bamenza inkosi eJerusalema esikhundleni sikayise.

2 Chronicles 36

1 Abantu belizwe bathatha uJehoyahazi indodana kaJosiya bamenza inkosi eJerusalema esikhundleni sikayise.

Ukubusa KukaJehoyahazi

2 UJehoyahazi wayeleminyaka engamatshumi amabili lantathu yobudala esiba yinkosi, njalo wabusa eJerusalema okwezinyanga ezintathu. 3 Inkosi yaseGibhithe yamethula ubukhosi eJerusalema njalo yathelisa abakoJuda amathalenta alikhulu esiliva kanye lethalenta legolide. 4 Inkosi yaseGibhithe, yabeka u-Eliyakhimu, umfowabo kaJehoyahazi, ukuba abe yinkosi yakoJuda laseJerusalema yasiguqula ibizo lika-Eliyakhimu laba nguJehoyakhimu. Kodwa uNekho wathatha umfowabo ka-Eliyakhimu uJehoyahazi wamusa eGibhithe.

UJehoyakhimu iNkosi yakoJuda

5 UJehoyakhimu wayeleminyaka engamatshumi amabili lanhlanu ubudala esiba yinkosi, njalo wabusa eJerusalema okweminyaka elitshumi lanye. Wenza ububi phambi kukaJehova uNkulunkulu wakhe. 6 UNebhukhadinezari inkosi yaseBhabhiloni wamhlasela wambopha ngamaketane ethusi wasemusa eBhabhiloni.

7 UNebhukhadinezari wasuka lezinye izimpahla zethempeli likaJehova wazisa ethempelini lakhe elaliseBhabhiloni.

8 Ezinye izehlakalo ngombuso kaJehoyakhimu, lamanyala awenzayo lakho konke okwafunyanwa kulihlazo ngaye, kulotshiwe egwalweni lwamakhosi ako-Israyeli lakoJuda. UJehoyakhini indodana yakhe wathatha isikhundla waba yinkosi.

UJehoyakhini iNkosi YakoJuda

9 UJehoyakhini wayeleminyaka elitshumi laficamibili ubudala esiba yinkosi, njalo wabusa eJerusalema okwezinyanga ezintathu lezinsuku ezilitshumi. Wenza ububi phambi kukaJehova.

10 Kwathi entwasa, inkosi uNebhukhadinezari yathumela ukuthi bamlethe eBhabhiloni, kanye lezimpahla eziligugu ezazivela ethempelini likaJehova, wabeka uZedekhiya isihlobo sikaJehoyakhini ukuba yinkosi yakoJuda laseJerusalema.

UZedekhiya iNkosi YakoJuda

11 UZedekhiya wayeleminyaka engamatshumi amabili lanye ubudala esiba yinkosi, njalo wabusa eJerusalema okweminyaka elitshumi lanye. 12 Wenza ububi phambi kukaJehova uNkulunkulu wakhe njalo kazange azithobe ngaphansi komphrofethi uJeremiya, owayekhulumela uJehova.

13 Wahlamukela inkosi uNebhukhadinezari, owayemfungise ngebizo likaNkulunkulu. Waba ntamolukhuni, inhliziyo yakhe kayaguquka, kazange azithobe kuJehova, uNkulunkulu ka-Israyeli. 14 Abakhokheli bonke babaphristi lababantu baqhubeka ngokungathembeki, belandela izenzo ezingamanyala zezizwe, bengcolisa ithempeli likaJehova, ayezehlukanisele lona eJerusalema.

Ukuwa KweJerusalema

15 UJehova, uNkulunkulu wabokhokho babo, wathumela ilizwi ephindaphinda ngezithunywa zakhe, ngoba wayelesihawu ebantwini bakhe kanye lendawo yakhe yokuhlala. 16 Kodwa izithunywa zikaNkulunkulu babezihleka ulunya, beseyisa amazwi akhe njalo beklolodela abaphrofethi bakhe lwaze lwavutha ulaka lukaJehova ebantwini bakhe kungasekho okunganceda. 17 Ngakho wathuma inkosi yaseBhabhiloni, yabulala amajaha akibo ngenkemba endlini engcwele, njalo akusindanga jaha loba ntombi, indoda endala loba oseluphele. UNkulunkulu wabanikela bonke esandleni sikaNebhukhadinezari.

18 Wathutha zonke izimpahla zethempeli likaNkulunkulu wazisa eBhabhiloni, zonke ezincinyane lezinkulu, kanye lezenotho yethempelini likaJehova lezenotho yenkosi leyezikhulu zayo. 19 Bathungela ngomlilo ithempeli likaNkulunkulu njalo badiliza umduli weJerusalema; batshisa zonke izigodlo batshabalalisa lakho konke okwakuligugu khonapho.

20 Wathatha bonke ababesele bengadliwanga yinkemba wabasa eBhabhiloni baba yizichaka zakhe lezamadodana akhe kwaze kwangena umbuso wasePherisiya. 21 Ilizwe lazuza ukuphumula kwalo kwamasabatha; kuso sonke isikhathi salo sencithakalo laphumula kwaze kwaphela iminyaka engamatshumi ayisikhombisa ukugcwalisa ilizwi likaJehova elakhulunywa nguJeremiya.

22 Ngomnyaka wakuqala wenkosi uKhurosi wasePhesiya, ukuze kugcwaliseke ilizwi likaJehova elakhulunywa nguJeremiya, uJehova wathinta inhliziyo kaKhurosi inkosi yasePhesiya ukuthi akhuphe isimemezelo embusweni wakhe esilotshwe ukuthi:

23 “Nanti ilizwi lenkosi yasePhesiya elithi: “UJehova, uNkulunkulu wasezulwini unginike yonke imibuso yomhlaba njalo ungikhethile ukuba ngimakhele ithempeli eJerusalema koJuda. Loba ngubani, wabantu bakhe phakathi kwenu – sengathi uJehova uNkulunkulu wakhe angaba laye, kahambe.’ ”